طَبعكْ ياَ بْنَادم..؟،،

~.~.~ 

كَالو القسوة طبعك..،

 أُومن عاشركْ تاديهْ

اللسانْ سيف يبتر ماليه الجامْ

والقلب كِيلفحم معتمْ

مَافيه للحب مكانْ

كَالو وقساو وكل خير مني انسوْ

هدا طبعك يابنادم غدارْ

تاكل لحم خوك او تسقيه لمرارْ

وتكَُولْ قسات ليام وتغير الزمانْ

تنسى يا بنادم دْنوبك كيلجبالْ

تبكي وعلى غيرك ترمي لملامْ

ما قدك مالْ...

 ونعمة صحة من عند الرحمانْ

كي النار تأكل ما تعرف للشبعة مقامْ

لطمعك تقذف الطاهرْ وتكذب البرهانْ

كي لبحر فغدروُ

 وفمعطاه ماتشبه ليه بْفعالْ

ظالم يا بنادم وما فيك أمَانْ

بيتك شبرين وتطمع فملك الجيرانْ

تروغ كيثعبان وتتلون كلحربا بعدة الوانْ

لمصالحك تتبسم وتحلي فلكلامْ

ونهار تتمكن تْطعنْ فظهر الخلان..بكل مكانْ

ظالم يا بنادم أو فات فيك الحالْ

ليا رب واحد ليه أنوجه لكلامْ

نرفع كفوفي ونتدرع بين ادين الرحمانْ

هذا زمان كي لجمرة فلكفوفْ

 كيف قال النبي العدنانْ

يا صاحب الصدق لاتحزن من ظلم الخِلانْ

عند ربك تلقى لصبرك خيرْ ما ليه أمثالْ

ربنا كريم ما يضع إنسانْ

عادل مَا يظلمْ

 وحده الحاكم بكل زمانْ

ليك ياربي فوضت أمري ورضيت بلقسامْ

رْضاتك غايتي ومَاهمني من الناس بهتانْ

,,